Patay ang usa ka babaye nga napalgan sulod mismo sa San Fernando El Rey Church sa Poblacion, Liloan pasado alas 9:00 sa buntag, Biyernes, Oktubre 24, 2025.
Ang biktima gibana-banang 30 anyos, nagsul-ob og itom nga “Gucci” nga T-shirt ug itom nga pedal pants. Adunay kini samad sa ulo, agi sa pagtuok sa liog, ug nagtulo ang dugo sa ilong sa dihang nakit-an sa mga pulis ug MDRRMO responders.
Sumala sa usa ka tindera og kandila, nakita niyang uban sa lalaki ang biktima ug nadungog pa niya nga misinggit kini nga daw gipasakitan. Pagkahuman sa hitabo, wala na makit-e ang maong lalaki nga giingong nakauban pa sa misa sa buntag.
Gipasabot sa mga staff sa simbahan nga giingnan nila ang duha nga mogawas una kay manglimpyo pa sila, apan paglabay og pipila ka oras, nakit-an na lang ang biktima nga patay. Gidala kini sa Danao City District Hospital, apan gideklarar nga dead on arrival.
Padayon karon ang imbestigasyon sa Liloan Police, lakip ang pag-review sa CCTV footage aron maila ang lalaki nga kuyog sa biktima ug masuta kung unsay hinungdan sa krimen nga nahitabo sulod mismo sa simbahan.
I via Renante Socia Lada