Nagpasalig si Gob. Pamela Baricuatro, gobernador sa Cebu Province, nga walay kakulang sa suplay sa humay ug gasolina sa probinsya bisan pa sa nagpadayon nga tensyon ug gubat sa Middle East.
Sa press briefing nga gihimo sa Cebu Provincial Capitol niadtong Marso 4, giingon sa gobernador nga base sa datos sa Department of Agriculture, nagpabiling lig-on ang suplay sa bugas sa Cebu.
Apan, iyang giila nga adunay pipila ka retailers nga nagpataas sa presyo ug nagkuha og labaw nga kita tungod sa kahimtang. Busa, iyang gipasidan-an ang mga negosyante nga dili magpahimulos sa sitwasyon kay gibantayan sa probinsyal nga gobyerno ang presyo sa mga palaliton.
Sumala sa gobernador, wala pay panginahanglanon nga ipatuman ang price control, apan padayon ang pag-monitor sa presyo sa bugas, gasolina, harina, asukar ug uban pang importanteng produkto aron maprotektahan ang mga konsumidor.
Niadtong Marso 2, mipirmar usab si Gob. Baricuatro og Executive Order No. 15 nga naglatid sa mga lakang aron mapugngan ang epekto sa gubat sa Middle East sa ekonomiya, suplay sa pagkaon, ug enerhiya sa probinsya. Ang Kapitolyo nakigtambayayong sa Department of Trade and Industry ug uban pang ahensya aron mapadayon ang kalig-on sa merkado.
Gipahimangnoan usab sa gobernador ang publiko nga dili kinahanglan mag panic buying kay igo ang suplay sa bugas ug gasolina sa Cebu. Samtang niini, giandam usab sa probinsyal nga gobyerno ang mga programa aron motabang sa mga Overseas Filipino Workers nga posibleng mouli gikan sa Middle East kung kinahanglanon ang repatriation.
Kauban niini ang pag-andam og tabang pinansyal, temporary shelter, ug mga programa sa panginabuhian alang sa mga OFW sa pakigtambayayong sa Overseas Workers Welfare Administration ug Technical Education and Skills Development Authority.
Source: Cebu Province PIO
I via Renante Socia Lada