Sa selebrasyon sa National Women’s Month, gidayeg ni Gob. Pamela Baricuatro, gobernador sa Cebu Province, ang mga babaye nga miyembro sa kapulisan isip buhing pamatuod nga ang liderato dili limitado sa lalaki lamang.
Kini iyang gisulti atol sa kickoff ug awarding ceremony sa Women’s Month nga gipahigayon sa Police Regional Office 7 sa Camp Sergio Osmeña Sr. niadtong Marso 4.
Matod sa gobernador, ang usa ka babaye nga nagsul-ob sa uniporme sa Philippine National Police nagdala dili lang og otoridad kundi usab kaisog, disiplina ug pagpakabana sa katawhan.
Iyang giingon nga ang mga babayeng pulis nagsilbing inspirasyon sa mga batan-ong Sugboanang babaye nga nagdamgo nga mahimong lider ug makaalagad sa nasud.
Gidayeg usab ni Gob. Baricuatro ang liderato sa PNP tungod sa paghatag og patas nga oportunidad ug respeto sa mga babaye sa organisasyon.
Ang kalihokan kabahin sa tibuok bulan nga selebrasyon aron ilhon ang dakong kontribusyon sa mga babaye sa katilingban. Sa maong seremonya, gihatagan usab og Babaylan Leadership Award si Gob. Baricuatro ug pipila ka babayeng opisyal sa kapulisan isip pagpasidungog sa ilang serbisyo.
Sa iyang mensahe, iyang giingon nga kung motaas ang kahimtang sa mga babaye, motaas usab ang kalamboan sa tibuok katilingban, ug nanawagan siya sa padayon nga panaghiusa sa lalaki ug babaye aron matukod ang mas patas ug inklusibong komunidad.
Source: Cebu Province PIO
I via Renante Socia Lada