Miapil si Gob. Pamela Baricuatro, gobernador sa Cebu Province, sa panagtapok sa Muslim community nga gihimo sa Cebu Provincial Capitol niadtong Marso 4 aron sa pag-obserbar sa Ramadan ug sa pagdeklarar sa bag-ong Mufti sa Central Visayas.
Sa wala pa magsugod ang pormal nga programa, nagtigom ang mga Muslim sa tanaman sa Kapitolyo aron sa pag-ampo isip kabahin sa pagselebrar sa balaang bulan sa Ramadan. Ang mga deboto naglatag og prayer mats sa sagbot samtang gipahigayon ang pag-ampo nga naghatag og malinawon ug espirituhanong kahimtang sa lugar.
Human niini, gipadayon ang programa sulod sa Social Hall diin pormal nga gideklarar si Sheikh Aleem Alibsar M. Mampao isip bag-ong Mufti sa Region 7. Ang Mufti usa ka lider sa Muslim nga naghatag og giya sa mga butang may kalabotan sa Islamic faith ug balaod.
Sa iyang mensahe, giabiabi ni Gob. Baricuatro ang Muslim community ug nagpadayag sa iyang suporta sa maong kalihokan. Matod niya, ang maong okasyon nagpakita sa importansya sa pagtuo, panaghiusa ug respeto sa lain-laing relihiyon ug kultura sa probinsya.
Gipasiugda usab sa gobernador nga ang gobyerno sa probinsya nagpadayon sa pagpalig-on sa panaghiusa ug pagrespeto sa tanang relihiyon aron masiguro nga ang tanang Sugboanon mobati nga sila giila ug gisuportahan.
Ang kalihokan gitapos pinaagi sa iftar o ang unang pagbungkag sa pagpuasa sa mga Muslim isip kabahin sa Ramadan.
Samtang, nagplano usab ang probinsyal nga gobyerno sa National Commission on Muslim Filipinos nga magtukod og Provincial Office on Muslim Affairs and Cultural Heritage aron mas mapalambo ang serbisyo ug programa para sa Muslim community sa Cebu.
Source: Cebu Province PIO
I via Renante Socia Lada