Gipasiugda ni Governor Pamela “Pam” Baricuatro ang panginahanglan sa responsableng pagplano ug paghuman sa mga proyekto sa probinsya, human mitungha pag-usab ang suhestiyon nga magtukod og ikaduhang international airport sa Sogod, Northern Cebu.
Sa iyang regular nga press briefing kagahapon Oktubre 22, 2025, gipunting ni Gob. Baricuatro nga ang mga proyekto nga gigamit ang kuwarta sa katawhan kinahanglan klaro, tin-aw, ug makatabang gyud sa tinuod nga panginahanglan sa mga Sugboanon.
Nihimo siya og pamahayag human pangutan-a sa media bahin sa panawagan ni Fifth District Congressman Duke Frasco nga magtukod og bag-ong airport sa Sogod isip alternatibo sa Mactan-Cebu International Airport, human sa 6.9 magnitude nga linog nga miigo sa amihanang bahin sa Cebu niadtong Septiyembre 30.
“Maghimo na sab siya’g airport sa Sogod, wala pa gani niya nahuman ang Camotes?” matod ni Gob. Barucuatro ug gihulagway nga “ridiculous.”
Gipangutana usab sa gobernador kung unsaon pagpatuman sa bag-ong proyekto samtang ang Camotes Airport nga gisugdan pa niadtong miaging administrasyon, hangtod karon wala pa makompleto. Giingon pa niya nga adunay pa kunoy mga isyu sa bayranan ug obligasyon nga wala pa matubag.
“Daghan pa kaayong problema sa Camotes Airport, unya maghimo na sab og bag-o sa Sogod. Unahon sa nato ang mahuman kaysa magsugod na usab og laing proyekto,” dugang ni Gob. Baricuatro.
Giklaro sa gobernador nga dili kini pulitikanhon nga isyu, kondili usa ka panawagan alang sa matinud-anong pagdumala ug husto nga paghan-ay sa mga proyekto sa probinsya.
Source: Cebu Province PIO
I via Renante Socia Lada