Usa ka aksidente ang mikutlo sa kinabuhi sa usa ka respetado nga huwes sa lungsod sa Aloguinsan-Pinamungajan, Cebu, kagahapon sa buntag sa National Highway sa Barangay Cabiangon, Pinamungajan.
Ang biktima giila nga si Hon. Judge Carmela Rosario Cahig Pasquin, 41 anyos, Presiding Judge sa Municipal Circuit Trial Court (MCTC) sa Aloguinsan-Pinamungajan. Si Judge Pasquin nag-angkas sa usa ka Honda ADV 150 nga gimaneho ni Eric Lanzarate, 48, court processor sa maong korte.
Base sa imbestigasyon, samtang nagpadulong sila sa korte, kalit nga miliko paingon sa wala ang Suzuki Smash nga gimaneho ni Mark James Cabiling, 19 anyos, taga-Barangay Tajao, Pinamungajan. Tungod niini, nagbangga ang duha ka motorsiklo ug nangalabay ang mga sakay.
Si Judge Pasquin nakabaton ug grabeng kadaot ug gideklar nga Dead on Arrival (DOA) sa Pinamungajan District Hospital, samtang ang iyang kauban nga si Lanzarate naangol. Ang driver sa Suzuki ug duha niyang kauban nga sila si Rosalyn Anas ug Thely Lahaylahay usab naangol apan luwas na sa peligro.
Gi-hold karon sa kapulisan si Cabiling samtang giandam ang kaso nga Reckless Imprudence Resulting to Homicide, Physical Injuries, and Damage to Property batok kaniya.
Matod pa sa kapulisan, kini nga hitabo usa ka pahimangno sa tanan nga motorista nga magmatngon ug magpugong sa kadasig sa kalsada.
Sa pagkakaron, gipangayo sa lokal nga opisyal ug sa korte ang pag-ampo alang sa kalinaw sa kalag ni Judge Pasquin, nga giila nga masinabtanon ug matinud-anon nga alagad sa hustisya.
I via Renante Socia Lada