Gipasiugda ni Governor Pamela “Pam” Baricuatro ang kinahanglanon sa klaro ug matinud-anong paggamit sa kuwarta sa katawhan, human miabot ang isyu sa ₱1.153 milyon nga comfort room sa iyang lungsod sa Pinamungajan, Cebu.
Sa iyang regular nga press briefing sa Kapitolyo niadtong Oktubre 22, Miyerkules, giingon ni Gob. Baricuatro nga ang transparency dili lang kay pagsunod sa proseso, kondili usa kini ka pagpakita sa katungdanan sa mga opisyal sa katawhan nga nagbuwis sa ilang salapi.
“Why talk about the process when all you have to do is to put the cost of each item that you placed there? And if it adds up to ₱1.153 million, so be it,” Segon ni Baricuatro.
Gihagit ni Gob. Baricuatro ang mga opisyal sa munisipyo nga ipaskil sa publiko ang breakdown sa gasto aron makita sa katawhan kung asa gayud nagasto ang kuwarta. Ang maong proyekto nakadawat og daghang reklamo ug pagpangutana sa social media tungod sa gidak-on sa kantidad.
Matod pa sa gobernador, ang Department of the Interior and Local Government (DILG) nga nagpondo sa proyekto magsusi sa kaso. “The regional and provincial teams from DILG will go and inspect it, and we will just leave it at that kung unsay ilang findings. We’ll see how it goes, but they should be answerable to the law,” pamahayag sa gobernador.
Gipangutana usab sa gobernador ang ₱10 milyon nga gasto alang sa atop sa tennis court sa Pinamungajan. Matod niya, mas maayo unta kung gigamit ang maong pondo sa mas pangmasa nga proyekto sama sa water system, parks, o community gym nga makapahimulos ang daghang residente.
Sa katapusan, gipahinumduman ni Gob. Baricuatro ang tanan nga opisyal nga ang kuwarta sa gobyerno dili ilang kaugalingon, ug ang tinuod nga serbisyo publiko mao ang pagkamatinud-anon ug pag-amping sa salapi sa katawhan.
Source: Cebu Province PIO
I via Renante Socia Lada