Nagpatawag og tigum si Cebu Governor Pamela Baricuatro sa Provincial Price Monitoring Council (PPMC) niadtong Martes, Marso 10 aron bantayan pag-ayo ang presyo sa mga importanteng palaliton sa probinsya tungod sa tensyon sa Middle East.
Matud sa gobernador, kinahanglan nga hugtan ang pagmonitor sa presyo aron malikayan ang sobra nga pagpataas sa presyo sa mga tindahan. Miingon siya nga aksyunan sa gobyerno ang mga negosyante nga maningil og taas nga presyo nga walay klarong rason.
Gipahinumduman usab ni Gob. Baricuatro ang mga lokal nga opisyal sa mga lungsod ug syudad nga bantayan pag-ayo ang presyo sa ilang lugar. Ang mga tindahan nga mapamatud-ang nag-abuso sa presyo mahimong mapenahan ug posible usab nga makanselar ang ilang business permit.
Sa report sa Department of Agriculture, adlaw-adlaw nilang ginabantayan ang presyo sa bugas, mais, karne, gulay, prutas ug uban pang palaliton. Klaro usab nga ang ₱70 kada kilo nga bugas nga nabalita online usa lamang ka premium nga brand ug dili mao ang kasagaran nga presyo sa bugas sa merkado.
Sumala sa Department of Trade and Industry (DTI), stable gihapon ang presyo ug supply sa mga basic goods sa Cebu ug igo ang stock nga mosuplay sulod sa tulo ka bulan.
Gitambagan usab ang publiko nga likayan ang panic buying kay igo pa ang suplay sa mga palaliton sa karon.
Source: Cebu Province PIO
I via Renante Socia Lada