Gipaila sa Development Academy of the Philippines (DAP) ang ilang youth leadership program nga BAGANI: Rising Leaders Development Program sa Cebu Province aron mahatagan og training ang mga batan-ong lider sa gobyerno ug sa mga eskwelahan.
Gihisgutan ang programa sa usa ka courtesy meeting uban kang Pamela Baricuatro niadtong Martes, Marso 10 sa Kapitolyo. Tumong sa programa nga mapalig-on ang abilidad sa mga batan-ong lider aron makatabang sila sa pagpalambo sa komunidad ug rehiyon.
Gisuportahan ni Gob. Baricuatro ang maong programa alang sa mga batan-ong Cebuano. Lakip sa oportunidad nga ihatag sa programa ang libreng training ug immersion sa mga international universities aron mas mapalambo pa ang kahibalo sa mga partisipante.
Ang programa bukas alang sa mga batan-on nga edad 18 hangtod 30 anyos nga nagserbisyo sa gobyerno, lakip na ang mga opisyal sa Sangguniang Kabataan, student leaders sa unibersidad, ug mga lider sa youth organizations.
Libre ang pag-apil sa BAGANI program alang sa mga mapiling partisipante. Ang aplikasyon para sa fellowship program modawat hangtod Marso 22, 2026, samtang ang online learning track bukas hangtod Hulyo 2026.
Source: Cebu Province PIO
I via Renante Socia Lada
Renante