Nagpadayon ang Cebu City sa pagpalig-on sa mga pagpangandam alang sa mga miting nga may kalabotan sa Association of Southeast Asian Nations o ASEAN nga gikatakdang mahitabo sa Mayo 2026.
Niadtong Marso 5, gidawat sa Cebu City Government si Mariel Eduarte, Assistant Secretary sa Presidential Communications Office, kinsa mibisita sa siyudad aron hisgutan ang mga pagpangandam alang sa pag-abot sa mga delegado sa ASEAN. Kauban usab sa miting si Fayette C. Riñen, Regional Head sa Philippine Information Agency Region 7.
Sa maong panaghisgot, gihisgutan ang mga lakang aron masiguro nga andam ang siyudad sa maong internasyonal nga kalihokan. Apil niini ang pag-andam sa mga national highways pinaagi sa pagbutang og lamp posts ug mga banner, ug pag-ila sa mga dalan nga agian sa mga delegado.
Gipasiugda usab ang pagpalig-on sa komunikasyon aron ipakita ang kamahinungdanon sa ASEAN sa pagpalambo sa internasyonal nga kooperasyon ug pamuhunan.
Apil usab sa plano ang pakigtambayayong sa sektor sa negosyo, ilabi na sa Cebu Chamber of Commerce and Industry, aron masuportahan ang pagpangandam sa siyudad. Gitan-aw usab nga importante ang lig-on nga signal sa komunikasyon ug stable nga suplay sa kuryente sa mga lugar nga adtoan sa mga delegado ug media.
Nagpasalig ang Cebu City Government nga padayon silang makigtambayayong sa mga national agencies ug pribadong sektor aron masiguro nga andam ang siyudad sa pag-host sa mga kalihokan nga may kalabotan sa ASEAN.
Source: Cebu City PIO
I via Renante Socia Lada