Opisyal nang misalmot si Cebu Governor Pamela Baricuatro isip bag-ong Chairperson sa Regional Development Council (RDC) 7 atol sa Full Council Meeting nga gipahigayon sa Cebu Provincial Capitol niadtong Huwebes, Disyembre 4. Gitunol kaniya ang bandera sa RDC 7 ni Bohol Governor Erico Aristotle Aumentado, ilhanan sa pormal nga pagbalhin sa liderato.
Nagpasalamat si Gov. Aumentado sa tulo ka tuig nga pagsalig sa konseho kaniya isip chairman. Matod niya, masaligan si Gov. Baricuatro sa pagpadayon ug pagpalambo sa mga tumong sa rehiyon. Gipasiugda pa niya nga dako ang iyang pagsalig sa kapasidad sa bag-ong chairman sa pagdala sa Central Visayas ngadto sa mas maayong kahimtang.
Gipangulohan usab ni Gov. Aumentado ang panumpa sa katungdanan ni Gov. Baricuatro. Sa iyang mensahe, giingon ni Gov. Baricuatro nga dako kini nga dungog ug oportunidad para moserbisyo sa tibuok konseho. Iyang gipunting nga sa sunod tulo ka tuig, ang pokus sa RDC 7 mao ang lig-on nga imprastruktura, inclusive economic growth, ug mas lig-on nga health systems.
Matod niya, ang mga prayoridad nga proyekto nagpakita sa tinuod nga panginahanglan sa rehiyon ug sa tinguha nga mahimong mas konektado, mas andam sa kalamidad, ug mas apil ang tanan sa kauswagan. Ang RDC 7 mao ang labing taas nga policy-making body sa rehiyon ug nagtinabangay sa mga local government units ug national agencies aron masiguro nga ang plano ug proyekto mohaom sa regional ug national development goals.
Ang konseho naglangkob sa mga gobernador, mayors, regional directors sa mga ahensya, ug private sector representatives. Pinaagi sa panaghiusa sa lokal ug nasyonal nga sektor, nagpadayon ang RDC 7 sa paggiya sa Central Visayas ngadto sa hapsay, balanse, ug malungtarong paglambo.
Source: Cebu Province PIO
I via Renante Socia Lada