Usa ka dakong hayop sa dagat ang napalgan nga naglutaw sa kadagatan sa Barangay Kabac, Bantayan Island sa Northern Cebu pasado alas 12 sa udto sa Lunes, Enero 5, 2026. Ang maong hayop gituohang usa ka butanding o whale shark, base sa kadak-on ug porma niini.
Sumala sa mga residente sa lugar, una nilang namatikdan ang maong hayop nga naglutaw duol sa baybayon hinungdan nga dali nila kining gipahibalo sa lokal nga pangagamhanan ug mga awtoridad. Tungod sa kahadlok nga mahimong makaapekto kini sa kaluwasan ug kahimsog sa komunidad.
Matod sa mga otoridad, dili pa kini opisyal nga makumpirmar kon tinuod bang butanding ang maong hayop tungod kay padayon pa ang pagsusi ug pagtan-aw sa mga eksperto. Gilauman nga maghimo og assessment ang mga ahensya aron mahibal-an ang hinungdan sa kamatayon niini.
Sa kasamtangan, nagpadayon ang koordinasyon sa lokal nga pangagamhanan ug mga ahensya nga may kalabutan sa wildlife aron masiguro ang hustong pagdumala sa sitwasyon ug malikayan ang posibleng peligro sa katawhan ug sa palibot.
I via Renante Socia Lada