Usa ka 73-anyos nga Australian national ang nadiskobrehang patay sulod sa iyang giabangan nga lawak sa usa ka pension house sa Barangay Guizo, Dakbayan sa Mandaue, pasado alas 10:30 sa buntag niadtong miaging adlaw.
Nabantayan sa caretaker sa pension house ang isug nga baho nga naggikan sa usa sa mga lawak, hinungdan nga dali niya kining gipahibalo sa manager ug misumbong sa kapulisan. Sa pag-abot sa mga awtoridad, didto na ilang nakit-an ang patay’ng lawas sa langyaw nga dugay nang namatay.
Ang biktima giila nga si Kevin Parrat, 73 anyos, usa ka Australian national nga dugay nang nag-abang sa maong pension house. Sumala kang Police Lieutenant Colonel Mercy Villaro, tigpamaba sa Mandaue City Police Office (MCPO), padayon pa ang imbestigasyon kabahin sa maong insidente.
Base sa inisyal nga kasayuran ug testimonya sa caretaker, gituohang mga pito ka adlaw nang patay ang biktima sa wala pa kini madiskobrehan. Giila usab sa mga sakop sa Regional Forensic Unit 7 pinaagi sa Scene of Crime Operation (SOCO) nga dugay na gyud nga namatay ang biktima.
Sumala pa sa kapulisan, serado ang lawak sa biktima ug walay nakita nga timailhan sa pagpugos nga pagsulod sa lain nga tawo, tungod kay wala maguba ang doorknob o haw-as sa pultahan. Bisan pa niini, nagtan-aw gihapon ang kapulisan sa posibilidad nga giatake ang biktima nga maoy hinungdan sa iyang kamatayon.
Gipaabot pa sa MCPO ang resulta sa awtopsiya aron mahibal-an ang tukmang hinungdan sa kamatayon ug aron matino ang sunod nga lakang sa imbestigasyon.
Dugang impormasyon, sukad sa panahon sa pandemya niadtong 2020, giingong wala na mobalik sa ilang dapit ang maong Australyano.
Sa kasamtangan, gipahibalo na sa Mandaue City Police Office ang Australian Embassy aron mapasayod ang pamilya sa biktima bahin sa nahitabo ug aron matabangan ang proseso sa koordinasyon.
Source: MCPO
I via Renante Socia Lada