Gisugdan sa Cebu City Government ang “Basura Namo, Kaugmaon Nato” nga programa sa Talamban Elementary School kagahapon, Hulyo 6. Tumong niini ang pagpakunhod sa basura nga madala sa landfill ug pagtudlo sa mga estudyante sa hustong pagbulag sa basura.
Gipangulohan ni Mayor Nestor Archival ang paglunsad sa programa uban sa laing opisyal sa siyudad ug sa Department of Education.
Nitambong usab ang mga magtutudlo, ginikanan, ug mga estudyante sa eskwelahan.
Sa maong programa, ang mga estudyante mahimong magdala og nabulag nga biodegradable ug non-biodegradable nga basura gikan sa ilang balay o mangolekta og mga recyclable nga materyales. Timbangon ang ilang madala, ug ang matag klase makadawat og 50 sentimos matag kilo isip insentibo.
Matod ni Mayor Archival, pinaagi sa programa, maminusan ang basura nga mapadulong sa landfill ug matudloan ang mga bata sa pag-atiman sa kalikupan. Sa unang adlaw sa programa, nakatigom ang mga estudyante og 170.2 ka kilo nga basura nga ipadala sa Ecostation aron husto nga maproseso.
I via Renante Socia Lada