Giawhag ni Cebu Governor Pam Baricuatro ang mga mihuman sa Cebu Technological University nga ipadayon ang pagkamatinud-anon, kaluoy ug pagsabot sa isigkatawo bisan pa sa kusog nga pagsaka sa paggamit sa artificial intelligence (AI).
Atol sa graduation ceremony kagahapon Hulyo 6, giingon sa gobernador nga daghan man ang mahimo sa AI, apan dili kini makapuli sa tinuod nga kalooy, pagkamatinud-anon ug pag-atiman sa uban.
Matod pa niya, dili mapulihan sa teknolohiya ang pagdasig sa usa ka tawo nga hapit na mohunong, ang paghatag og kahupayan sa nanginahanglan, ug ang pagsalig nga natukod pinaagi sa tinuod nga relasyon sa mga tawo.
Mikabat sa 232 ka estudyante gikan sa College of Technology ug College of Teacher Education ang nidawat sa ilang diploma. Ang tema sa maong graduation mao ang “The Technologist’s Heart: Fostering Human Connection in the Age of Artificial Intelligence.”
Gipahinumdoman usab ni Gov. Baricuatro ang Class of 2026 nga mahimong responsableng digital citizens pinaagi sa husto nga paggamit sa teknolohiya, pagsukol sa sayop nga impormasyon, ug pagpalig-on sa kamatuoran ug panaghiusa.
Matod pa niya, ang kalibotan dili lang nagkinahanglan og mga maalamon nga tawo, kondili usab mga matinud-anon, matinabangon ug adunay kasingkasing sa pag-alagad sa isigkatawo.
I via Renante Socia Lada