Nadakpan sa kapulisan ang usa ka e-bike driver human makuhaan og pusil nga walay legal nga papeles sa Barangay Basak San Nicolas, Cebu City sa gabii sa Hunyo 1, 2026.
Sumala sa Police Station 11 sa Cebu City Police Office (CCPO), nakadawat sila og sumbong gikan sa usa ka concerned citizen mahitungod sa usa ka armadong lalaki sa maong lugar. Tungod niini, daling mitubag ang mga pulis nga gipangulohan ni Police Captain Arnel Ancheta aron susihon ang report.
Pag-abot sa mga pulis, ilang nakita ang usa ka lalaki nga mitakdo sa deskripsyon nga gihatag sa nagtaho. Nakasakay kini sa usa ka e-bike ug misulay pag-ikyas sa dihang namatikdan ang presensya sa kapulisan.
Gisugdan dayon sa mga pulis ang hot pursuit operation nga misangpot sa pagdakop sa suspetsado.
Atol sa legal nga pag-intervene sa kapulisan, nakit-an sa suspetsado ang usa ka kalibre .38 nga revolver ug usa ka buhing bala. Napakyas siya sa pagpakita og mga dokumento nga nagtugot kaniya sa pagpanag-iya ug pagdala sa maong pusil ug bala.
Tungod niini, gidakop siya sa kasong paglapas sa Republic Act 10591 o ang Comprehensive Firearms and Ammunition Regulation Act.
Gidala ang suspetsado sa Police Station 11 alang sa hustong dokumentasyon ug pagproseso samtang giandam na ang mga kaso nga ipasaka batok kaniya sa korte.
Matud pa sa CCPO, kabahin kini sa ilang padayon nga kampanya batok sa mga loose firearms aron malikayan ang posible nga mga krimen ug mapadayon ang kalinaw ug kaluwasan sa komunidad.
I via Renante Socia Lada