Nakadakop ang Cebu Police Provincial Office (CPPO) og 591 ka mga nakalapas sa balaod ug lokal nga ordinansa atol sa pagpatuman sa Safer Cities Initiative sa tibuok lalawigan sa Sugbo niadtong Hunyo 1, 2026.
Gawas niini, 211 usab ka anti-criminality operations ang gihimo aron mapadayon ang kalinaw ug kahapsay sa mga komunidad.
Base sa rekord sa CPPO, kadaghanan sa mga nakalapas mao ang mga mi-violate sa city ug municipal traffic ordinances diin 425 ka tawo ang nasikop ug gipamultahan. Nadakpan usab ang 70 ka menor de edad nga nakagawas sa oras sa curfew, 54 ka tawo nga nag-inom sa pampublikong lugar, ug 20 ka tawo nga nagsuroy nga walay sul-ob nga pang-ibabaw nga sapot sa lawas sa publiko nga lugar.
Nasikop usab ang 14 ka tawo nga nanigarilyo sa mga lugar nga gidili ug walo ka kaso sa paggamit og karaoke lapas sa gitakdang oras. Tungod niini, mikabat sa ₱189,500 ang nakolektang multa ug silot gikan sa nagkadaiyang paglapas sa ordinansa.
Matod ni CPPO Provincial Director PCOL Abubakar Udang Mangelen Jr., importante ang padayon nga pagpatuman sa mga lokal nga ordinansa aron malikayan ang mas dagkong problema sa seguridad ug kalinaw. Iyang gipasiugda nga ang maong programa makatabang sa pagdisiplina sa publiko ug pagpakunhod sa posibilidad sa krimen sa komunidad.
Gidayeg usab ni PRO7 Regional Director PBGEN Arnold Evangelista Abad ang paningkamot sa mga kapulisan sa Sugbo, samtang gipadayag ni Governor Pamela Baricuatro ang suporta sa probinsyal nga gobyerno sa mga programa nga nagpalig-on sa disiplina ug kaluwasan sa katawhan.
Gipasalig sa CPPO nga magpadayon ang Safer Cities Initiative pinaagi sa regular nga operasyon ug hugot nga pakigtambayayong sa mga lokal nga kagamhanan.
I via Renante Socia Lada