Gilusad sa Cebu City Police Office (CCPO) ang ilang Proficiency Firing Program pinaagi sa usa ka opening ceremony nga gihimo kagahapon Hunyo 2, 2026 sa CCPO Firing Range sa Camp Sotero Cabahug, Gorordo Avenue, Cebu City.
Ang maong programa nagtumong sa pagpalambo sa kahibalo ug kahanas sa mga pulis sa husto nga paggamit sa pusil, pagpaayo sa ilang pagpamusil, ug pag-andam kanila sa lain-laing operasyon alang sa kaluwasan sa publiko.
Mitambong sa kalihokan ang mga opisyal ug kapulisan sa CCPO uban ang mga bisita gikan sa Cebu City Peace and Order Council lakip sila si Konsehal Paul Labra ug si Arnel Tancinco, Chief of Staff sa konseho.
Atol sa programa, gipahinumdoman ang mga pulis nga importante kaayo ang maayong kahanas sa paggamit sa pusil aron masiguro nga luwas, legal, ug epektibo ang ilang pagpatuman sa katungdanan isip mga tigpatuman sa balaod.
Human sa seremonya, misalmot ang mga pulis sa firing exercises ubos sa hugot nga pagbantay sa mga range officers ug safety personnel. Gisunod usab ang tanang safety protocols aron malikayan ang aksidente ug masiguro ang kaluwasan sa tanang partisipante.
Matud sa CCPO, ang Proficiency Firing Program dili lamang usa ka kinahanglanon sa serbisyo kondili usa usab ka paagi aron mapalambo ang kahanduraw, pagsalig sa kaugalingon, ug propesyonalismo sa mga pulis nga motubag sa mga emerhensya ug kritikal nga insidente.
Pinaagi sa padayon nga pagbansay ug pagpalambo sa kahibalo sa paggamit sa armas, nagpadayon ang CCPO sa ilang tumong nga makabaton og disiplinado, andam, ug kompetenteng pwersa sa kapulisan alang sa kalinaw ug kaluwasan sa katawhan sa Sugbo.
I via Renante Socia Lada