Nasunog ang 16 ka balay sa usa ka residential area sa Sitio Saac 2, Zone 7, Barangay Buaya sa Lapu-Lapu City alas 9:00 sa buntag karong Marso 24, 2026.
Sumala sa inisyal nga imbestigasyon sa Lapu-Lapu City Fire District, naapektuhan ang mga balay nga gipanag-iya ni Bernadette Inot ug iyang pamilya nga naglangkob og 10 ka miyembro, apil na ang ubang silingan nga balay. Dali dayong mitubag ang mga bombero gikan sa Mactan Fire Station, Maribago, ug mga personnel sa City Disaster Risk Reduction and Management Office uban sa fire volunteers.
Gikompirmar ni Fire Inspector Phoenix Mackenzie Gocuan nga nakontrol ang sunog alas 9:49 sa buntag. Wala’y natalang patay o nasamdan sa maong insidente. Gipangulohan ang fire operations nila FO2 Rowel Brañanola, uban nila FO2 Marwin Olano ug FO1 Felix Nadel Jr. nga nag-coordinate sa lugar.
Padayon pa ang imbestigasyon sa hinungdan sa sunog. Samtang, gimando ni Mayor Cindi King-Chan ang paghatag dayon og tabang sa mga biktima pinaagi sa DRRM Humanitarian Assistance Response Team, lakip ang init nga pagkaon ug non-food items.
Ang City Social Welfare and Development Office nagpadayon sa pag-validate sa gidaghanon sa apektadong pamilya ug nag-profile aron mahatagan sila og emergency cash assistance.
Source: Lapu -Lapu City PIO
I via Renante Socia Lada