Usa ka pinasikad nga operasyon sa kapulisan ang nagresulta sa dakong pagkasakmit sa mga armas ug ginadudahang ilegal nga droga nga nagkantidad og kapin ₱1.8 milyon atol sa pag-implementa sa usa ka search warrant niadtong Mayo 23, 2025 sa Purok Mangga, Sitio Danikop, Barangay Basak, Compostela, Cebu.
Ang operasyon gipangulohan sa Compostela Municipal Police Station (MPS) uban sa suporta sa RIU-7, PIU-CPPO, IST-PMFC, ug Sac 64th Company, human gipagawas sa korte ang Search Warrant batok kang Reynaldo Laguna Lucero, nga hangtod karon gipanangita pa sa awtoridad.
Sa gilusad nga operasyon alas 7:45 sa buntag, gihimo ang maampingong pagpangita sa balay sa suspetsado uban sa presensya sa mga testigo nga sila Barangay Official Hon. Jungi Canamucan ug media representative Mr. Rafael Goc-ong.
Nasakmit gikan sa balay ni Lucero ang Usa ka 9mm KG9 nga walay serial number, Shotgun ug 9mm revolver nga walay serial number, 21 ka buok nga live ammunition, 11 ka pakete sa ginadudahang shabu nga gitimbang nga 219 gramos.
Gawas kang Lucero, duha pa ka lalake ang nadakpan sa lugar nga giilang sila Allien Tongal Ochea ug Renan Malabon, nga kapwa posibleng kasabwat sa ilegal nga kalihukan.
Nakuha gikan kang Ochea ang Caliber .45 pistol nga may serial number, 9mm revolver mga bala sa nagkalain-laing kalibre, Mga magasin ug bag nga naglangkob sa armas ug bala.
Samtang kang Malabon, nakuha ang Norinco 9mm pistol nga may serial number, Magazine ug lima ka buok bala.
Gibanabana nga ang nasakmit nga ginadudahang shabu adunay street value nga ₱1,883,400.00. Ang mga nadakpan gibalhin sa Compostela MPS alang sa dokumentasyon ug andam nang pasakaan og mga kasong kalapasan sa Comprehensive Dangerous Drugs Act ug Illegal Possession of Firearms and Ammunitions.
Padayon ang imbestigasyon samtang gilantaw pa sa kapulisan ang mga posibling koneksyon o kauban sa grupo ni Lucero.
I via Renante Socia Lada