Nadakpan na sa Cebu City Police Office (CCPO) ang duha ka suspetsado nga nalambigit sa insidente sa pagpamusil nga nakapatay sa usa ka 17-anyos nga lalaki sa Barangay Basak Pardo niadtong Hunyo 6, 2025.
Sumala sa report sa kapulisan, ang biktima kuyog sa iyang mga barkada aron motan-aw og basketball duol sa ilang lugar, dihang kalit lang miabot ang duha ka tawo sakay og motorsiklo ug mipusil sa ilang target. Wala maigo ang ilang gipunting, apan nasayop og igo ang bala ug naigo ang biktima. Gidala siya sa ospital, apan namatay gihapon tungod sa grabeng samad.
Pinaagi sa sunod-sunod nga operasyon sa Criminal Investigation and Detection Unit (CIDU), Police Station 7, ug uban pang mga sakop sa CCPO, nadakpan ang duha ka suspetsado niadtong Hunyo 8, 2025. Ang usa kay 43-anyos nga construction worker, ug ang usa pa kay 26-anyos nga taga Sitio Paradise 2, Barangay Kinasang-an. Usa pa ka suspetsado ang padayon pang gipangita sa kapulisan.
Sa pagsikop sa usa sa mga suspetsado, nakuhaan kini og .38 caliber nga pusil nga adunay upat ka walay sulod nga bala ug duha ka buhi pa. Giimbestigar karon ang maong pusil isip ebidensya sa kaso. Nagpadayon usab ang operasyon aron madakpan ang ikatulo nga suspetsado.
Gipasalamatan ni PCOL Enrico E. Figueroa, ang Acting City Director sa CCPO, ang tanang pulis nga naningkamot aron masulbad ang kaso. Giingon niya nga ang kapulisan seryoso sa pagpanalipod sa katawhan ug buot nilang makab-ot ang hustisya para sa biktima ug sa iyang pamilya.
Source: CCPO
I via Renante Socia Lada