Nadakpan ang duha ka gidudahang drug personalities atol sa buy-bust operation nga gihimo sa Asturias Municipal Police Station sa Barangay Poblacion, Asturias, Cebu niadtong nakalabay nga mga adlaw.
Sa operasyon, nasakmit sa kapulisan ang mga 7 ka gramos sa gidudahang shabu nga adunay balor nga ₱47,600, sumala sa Standard Drug Price. Nakuha usab gikan sa mga suspek ang usa ka .38 caliber revolver nga adunay duha ka buhing bala.
Ang nag-unang suspek usa ka 34 anyos nga lalaki nga giila isip High-Value Individual o HVI, samtang ang iyang kauban usa ka babaye nga residente sa Asturias, Cebu.
Ang operasyon gipahigayon sa Drug Enforcement Unit sa Asturias Police inubanan sa Philippine Drug Enforcement Agency o PDEA-7. Base sa imbestigasyon, giingong nagpalapad og ilegal nga drogas ang mga suspek sa Asturias ug sa kasikbit nga lungsod sa Tuburan ug Balamban pinaagi sa meet-up nga transaksyon.
Gipasakaan na og kaso ang mga nadakpan tungod sa paglapas sa Republic Act 9165 o Comprehensive Dangerous Drugs Act ug Republic Act 10591 nga may kalabotan sa ilegal nga armas. Samtang, gidayeg ni Cebu Police Provincial Office Director PCOL Abubakar Udang Mangelen Jr.
ang mga operatiba ug mipasalig nga padayon nilang pakusgon ang kampanya batok sa ilegal nga drogas ug kriminalidad sa probinsiya sa Sugbo.
📸 CPPO
I via Renante Socia Lada