Gipasabot sa Cebu City Police Office ngadto sa publiko nga bakak ug makalibog ang naglutaw sa social media nga adunay hostage-taking incident sa Freedom Park daplin sa Magallanes Street, Barangay Ermita, Cebu City.
Sumala sa kapulisan, alas 10:30 sa buntag niadtong Mayo 21, 2026, nagpahigayon ang mga personnel sa Police Station 5 og Simulation Exercise o SIMEX isip kabahin sa ilang pagbansay alang sa mas paspas ug epektibong responde sa mga emerhensya ug kritikal nga insidente sama sa hostage ug crisis situations.
Gipatin-aw usab sa CCPO nga sa wala pa gihimo ang simulation exercise, adunay hustong koordinasyon ug gibutangan og mga tarpaulin ug pahibalo nga adunay sulat nga “ON-GOING SIMULATION EXERCISE” aron mahibal-an sa publiko nga pagbansay lamang ang nahitabo ug aron malikayan ang kalisang.
Tungod sa sayop nga impormasyon nga mikaylap online, gihangyo sa CCPO ang publiko nga magmatngon ug responsable sa paggamit sa social media. Giawhag usab nila ang tanan nga siguruhong tinuod ug gikan sa opisyal nga tinubdan ang impormasyon sa dili pa kini i-post o ipaambit.
Nagpasalamat usab ang CCPO sa kooperasyon ug pagsabot sa publiko ug mipasalig nga magpadayon sila sa pagpanalipod sa kaluwasan ug kalinaw sa katawhan pinaagi sa propesyonal ug transparent nga operasyon.
📸 CCPO
I via Renante Socia Lada