CEBU: DUHA KA MGA LALAKI NGA LUWAN SA MOTORSIKLO MIDASMAG SA MULTICAB SA NAGA CITY, PATAY

Patay ang duha ka mga lalaki human mibangga ang ilang motorsiklo sa likod sa usa ka naka-park nga multicab sa National Highway sa Barangay Tuyan, Naga City, alas-2:40 sa kadlawon, Agosto 30, 2026.
Giila ang mga biktima sa kapulisan nga sila si alyas “Mar,” 25 anyos, drayber sa Honda Click 125 ug residente sa Barangay Inayagan, ug iyang pasahero nga alyas “Mark,” 30 anyos, nga residente usab sa maong barangay.
Matod sa Naga City Police Station, gikan sa Tangke paingon sa Barangay Inayagan ang duha sa dihang mibangga ang ilang motorsiklo sa likod nga bahin sa multicab nga naka-park sa highway padulong sa Cebu City. Gituohang nakainom sila og makahubog nga ilimnon ug kusog ang dagan sa motorsiklo sa wala pa ang aksidente.
Nangalagpot ang duha ka biktima sa karsada tungod sa kusog nga impact ug nakaangkon og grabeng samad. Gidala sila sa Naga City Infirmary apan gideklarar nga patay sa doktor. Padayon ang imbestigasyon sa Naga City Police Station.
📸 Contributed
I via Renante Socia Lada