Nasikop ang duha ka miyembro sa LGBT community nga giingong naningkamot nga mangayo ug ₱2 milyon gikan ni Basak Barangay Captain Jasmine “Daday” Chan sa Lapu-Lapu City. Giingon nga naglisod pa kini og pangita og pyansa human napasakaan ug kaso.
Ang duha ka suspek giila lang sa alyas “Regina” ug “Jon,” pulos 29 anyos ug nagpuyo sa Barangay Agus, Lapu-Lapu City. Nadakpan sila atol sa entrapment operation sulod mismo sa Basak Barangay Hall niadtong niaging mga adlaw.
Segun sa reklamo ni Kapitan Chan, ang duha mibahad kaniya nga ipakatap sa internet ang iyang mga litrato ug video nga mahimong makadaot sa iyang pangalan sa politika kung dili siya mobayad sa giingong kantidad. Tungod niini, mitabang sa kapolisan ang kapitan ug giplano ang operasyon.
Gidakop ang mga suspek human madawat nila ang gimarkahan nga ₱2 milyon nga “boodle money.” Nakumpiskar usab ang ilang mga cellphone diin giingon nga naglakip sa sensitibo nga mga litrato ug video sa kapitan. Ang duha karon nag-atubang og kaso nga Robbery Extortion in relation to Cybercrime ug Grave Threats.
Karon pa lang sila nakapyansa human napreso sukad pa sa operasyon. Si Kapitan Chan, nga anak ni Mayor Cindi King Chan ug Congressman Junard “Ahong” Chan, mitubag usab sa mga isyu sa social media nga naglakip kaniya sa mga “Nepo Babies,” ug iyang gisulti nga bakak ang pasangil ug limpyo ang iyang pangalan.
I via Renante Socia Lada