Nikalas ug duha ka kinabuhi ang aksidenti sa kadalanan didto sa National Road, Sitio Kapilyahan, Barangay Guinsay, Siyudad sa Danao, Pasado alas 5:10 kagahapon sa buntag, Pebrero 14,2023.
Naglambigit kini sa Driver sa motorsiklo, Pedestrian ug Armoured Car.
Ang driver sa motorsiklo nga nakalas giila nga si Erwin Relon Dinoy, Residenti sa Sitio Cemento, Barangay Pusok, Dakbayan sa Lapu-Lapu.
Ang Pedestrian nga namatay giila usab nga si Kimberly Calzada Lavador, 9 anyos ang panuigon, tinun-an, nagpuyo sa naasoy nga lugar.
Sa gihimo nga imbestigasyon sa Danao City Police Station pinanguluhan sa ilang hepe nga si PLTCOL Fortunato Ty Ecle Jr., nasayran nga nilabang ang maong bata sa karsada og nadasmagan kini ni Dinoy.
Sa kakusog sa dagan nalagpot ang bata sa pikas linya nga naligsan usab sa armoured car.
Puros nakalas didto sa tambalanan ang duha ka mga biktima.
Samtang gipangita pa hangtod karon ang maong armoured car nga nisibat human sa naasoy nga aksidenti.
Gisuwayan pa unta pag gukod sa mga tawo ang naasoy nga armoured car apan wala gyud kini nihunong sa pagpadagan paingon sa Norte.
Sa pagkakaron nangita pa sila og mga CCTV footage sa maong lugar aron pag ila sa nisibat nga armoured card. (Renante Lada)