Nabantayan ang Duha ka alimpus kon ipo-ipo sa kadagatan nga sakop sa Lapu-Lapu City ug Cordova sayo sa buntag karong Martes, Oktubre 14, 2025. Ang maong panghitabo nakakurat sa pipila ka mga residente nga nakakita niini gikan sa baybayon sa Mactan Island.
Sumala sa mga nakasaksi, dali ra kining naporma ibabaw sa dagat ug nagpadayon lamang sa pipila ka minuto sa wala pa kini mihupas. Ang duha ka ipo-ipo makita nga naglihok duol sa daplin sa dagat ug wala may nakaabot sa yuta, hinungdan nga wala kini nakaresulta og kadaut.
Wala usab may natala nga mga tawo nga naangol ni mga kabalayan nga nadaot atol sa maong panghitabo, nga nahimong viral sa socia media.
Matod sa mga eksperto, ang maong klase sa ipo-ipo gitawag og waterspout, ug kasagarang motungha kon init ug alinsangan ang panahon sa dagat. Kini kasagarang makita sa mga tropikal nga dapit ug sagad nga temporaryo lamang nga magpabilin.
Gipahimangnoan sa mga awtoridad ang publiko nga magmatngon gihapon kung moadto sa baybayon, ilabi na sa panahon nga adunay kalit nga kausaban sa panahon. Ang paglikay sa paglawig ug pagpanagat kung adunay makita nga parehas nga panghitabo girekomendar aron malikayan ang disgrasya.
I via Renante Socia Lada