Nagsuspenso og klase ang duha ka pampublikong eskwelahan sa kabukiran sa Cebu City kagahapon Agosto 5 isip lakang sa pag-amping human adunay mga post sa internet nga nakapukaw og kabalaka bahin sa kaluwasan sa mga estudyante.
Matod sa mga administrador sa eskwelahan, gihimo ang pagsuspenso sa klase aron unahon ang kaluwasan sa mga estudyante samtang gisusi pa sa mga awtoridad kung tinuod ba ang nahisgutan sa mga post. Nagpadayon usab sila sa pakigkoordinar sa Philippine National Police (PNP) ug uban pang ahensya.
Nagdeploy usab og kapulisan sa mga apektadong eskwelahan aron palig-onon ang seguridad ug hatagan og kasiguruhan ang mga estudyante, ginikanan, magtutudlo ug mga kawani sa eskwelahan.
Padayon usab ang pagmonitor sa sitwasyon aron masiguro ang kaluwasan sa tanan.
Samtang, normal gihapon ang klase sa ubang mga eskwelahan sa Cebu City apan gipalig-on ang ilang seguridad. Giawhag sa mga opisyal ang publiko nga dili motoo o mopakaylap og wala mapamatud-ang impormasyon ug magsalig lamang sa opisyal nga pahibalo gikan sa mga eskwelahan ug mga ahensya sa gobyerno.
Ang adunay kasaligan nga impormasyon bahin sa posibleng hulga gi-awhag nga dayong ireport sa mga awtoridad.
I via Renante Socia Lada