Subra ang kalipay sa duha ka mga lola nga miabot na sa edad nga 100 anyos sa probinsya sa Cebu human nakadawat og tag ₱100,000 nga Centenarian Incentive gikan sa Cebu Provincial Government isip pagpasidungog sa ilang ika-100 nga adlaw nga natawhan.
Ang usa sa mga nakadawat mao si Carmelita Espinosa Fajardo, 100 anyos, taga Barangay Patupat, Barili. Nadawat niya ang cash gift niadtong Pebrero 27, 2026. Si Fajardo usa ka inahan sa walo ka anak ug natawo niadtong Disyembre 25, 1925. Matud pa niya, ang sekreto sa iyang taas nga kinabuhi mao ang kanunay nga pagkaon og prutas.
Samtang niadtong Marso 6, 2026, nakadawat usab og parehas nga kantidad si Soledad J. Pabingwit, 100 anyos, taga Barangay Prenza, Balamban. Siya usa ka inahan sa 11 ka anak ug miingon nga ang iyang sekreto sa pag-abot sa 100 ka tuig mao ang pagkaon og himsog nga pagkaon ug kanunay nga pagbasa sa Bibliya.
Ang maong ayuda gipanghatag ubos sa liderato ni Cebu Governor Pamela S. Baricuatro pinaagi sa Cebu Provincial Social Welfare and Development Office (PSWDO).
Mitabang usab sa paghatod sa insentibo ang mga kawani gikan sa opisina nila Board Members Lorenz Lagon ug Julius Anthony “Oloy” Corominas, uban sa Municipal Social Welfare and Development Offices sa Barili ug Balamban. Mitambong usab ang mga kapamilya sa mga centenarian sa maong seremonya.
Sumala sa kapitolyo, ang kinabuhi sa duha ka centenarian nagpahinumdom nga ang himsog nga panginabuhi, pagtuo sa Diyos, ug lig-on nga pamilya usa sa mga sekreto sa taas ug malinawon nga kinabuhi.
Source: Cebu Province PIO
I via Renante Socia Lada