Magpahigayon og nagkadaiyang kalihokan ang Cebu Provincial Government sa Capitol sugod karong Lunes, Marso 9, 2026, isip pagsaulog sa National Women’s Month ug pagpasidungog sa dako nga papel sa kababayen-an sa panggamhanan ug sa komunidad.
Ang selebrasyon karong tuiga nagdala sa tema nga “WE for Gender Equality and Inclusive Society” uban sa sub-theme nga “Lead like the Babaylans, Filipinas!” nga naghatag og pag-ila sa kusog, liderato, ug impluwensya sa mga Filipina sa nagkadaiyang sektor.
Pangulohan ni Cebu Governor Pamela S. Baricuatro ang pagsugod sa kalihokan diin motambong ang mga babayeng lider, opisyal, ug empleyado sa Cebu Provincial Government aron sa pagpasidungog sa kontribusyon ug kalig-on sa mga Sugboanang kababayen-an.
Aduna usab giandam nga mga programa alang sa kahimsog ug empowerment sa mga babayeng empleyado sa Capitol isip kabahin sa selebrasyon.
Sa gabii, magpahigayon og “Gala for Women Leaders in Government” sa Capitol Social Hall aron pasidunggan ang mga babayeng lider ug partner sa gobyerno nga naghatag og dakong kontribusyon sa public service.
Padayon usab nga mag-organisar og lain-laing kalihokan ug programa ang Cebu Provincial Government sulod sa bulan sa Marso aron sa pagpalig-on sa gender equality ug women empowerment.
Source: Cebu Province PIO
I via Renante Socia Lada