Luwas ang usa ka online delivery driver human kini mituyo og bangga sa usa ka trailer truck sa Cebu South Coastal Road (northbound) kagahapon sa buntag. Sumala sa inisyal nga imbestigasyon, personal nga problema ang giingong hinungdan sa iyang gibuhat.
Matud pa sa 33-anyos nga driver, pipila na ka adlaw nga wala mopauli sa ilang balay sa Mandaue ang iyang partner tungod sa ilang panaglalis. Gisultihan niya nga misulay siya og pakig-istorya ug pag-apas kagahapon sa buntag, apan wala kini mouban niya.
Tungod sa iyang gibati nga kasubo ug kalibog, iyang gituyo nga ipabangga ang iyang gisakyan nga multicab sa usa ka trailer truck. Maayo na lang ug gamay ra nga samad sa tuhod ang iyang naangkon, ug wala’y grabeng kadaot sa trailer gawas sa natandog nga elevated traffic post sa CT-TODA sa maong lugar.
Nasayran usab nga adunay gipost ang driver sa miaging adlaw sa ibabaw sa Mactan Bridge nga nagpasabot sa iyang gibati, apan kini gi-delete na sa iyang social media account.
Sumala kang CT-TODA Head Jonathan Tumulak, magpadala sila og report ngadto sa Land Transportation Office alang sa posibleng aksyon. Samtang ang driver ug iyang partner gitugyan sa City Social Welfare Office ubos ni Coleen Enajada alang sa counseling.
Nag-awhag usab ang CT-TODA sa mga drayber nga adunay personal nga problema nga likayan una ang pagmaneho ug mangayo og tabang sa mga mental health professionals.
Source: CT-TODA
I via Renante Socia Lada