Nadakpan sulod lang sa usa ka oras ang drayber sa moderno nga public utility jeepney (MPUJ) nga nakuhaan sa video nga misaka sa gutter ug miagi sa sidewalk aron malikayan ang grabeng trapiko sa M.C. Briones Street, atbang sa San Miguel Brewery, pasado alas 11 sa buntag niadtong Lunes, Hulyo 28, 2025.
Ang video nga nakuha sa usa ka truck helper dayong nsgviral sa social media, diin makita ang MPUJ nga misaka sa bangketa ug miagi sa sidewalk, usa ka delikado ug iligal nga lihok ilabi na sa kasamok sa trapiko.
Ang 33-anyos nga drayber, taga-Medellin, Cebu, naghilak sa kahadlok ug kaulaw sa dihang gipresentar siya sa iyang operator ngadto sa TEAM Department Head nga si Hyll Retuya.
Sumala sa drayber, nabalaka siya tungod kay tapad siya sa usa ka dako nga trailer truck, ug sa iyang kakurat ug kabalaka, napugos siya nga mosaka sa sidewalk aron malikay sa disgrasya.
Gipasabot ni Retuya nga gisilutan ang drayber tungod sa reckless driving ug driving on sidewalk, nga mga kalapasan nga seryoso ug gikinahanglan og tukmang silot aron malikayan ang kapeligro sa kadalanan.
Nagpadayon ang pahimangno sa mga drayber nga magpuyo sa hustong disiplina ug sundon ang balaod trapiko aron malikayan ang disgrasya ug legal nga sangputanan.
I via Renante Socia Lada