Usa ka batan-ong minero ang namatay human kini giingong kalit nga gikutasan samtang nagtrabaho sa sulod sa usa ka tunnel sa minahan sa carbon sa Sitio Canlawilao, Barangay Dumalan, Dalaguete, Cebu, pasado alas 7:45 sa buntag niadtong Hulyo 27, 2025.
Ang biktima mao si Jordan Caliao Villacarlos, 18 anyos, ulitawo ug residente sa Sitio Mag-alambak, Barangay Mantalongon, Dalaguete. Sumala sa imbestigasyon sa Dalaguete Police, kauban sa biktima ang iyang maguwang sa trabaho sa maong minahan.
Matud sa report, samtang nagbutang sila og mga haligi sa tunnel isip suporta sa straktura, kalit lang nga gikapoy og gikutasan ang biktima, hinungdan nga nahugno kini ug napokpok ang dughan sa iyang maguwang.
Gidali og dala sa tambalanan ang biktima apan gideklarar kining patay sa pag-abot. Ang pulisya misugyot nga ipa-autopsy ang lawas aron masiguro nga walay foul play, apan gibalikatan kini sa inahan sa biktima tungod kay giingong adunay hika (asthma) ang iyang anak.
Nagpadayon ang pagpangolekta og dugang impormasyon sa kapulisan kabahin sa maong insidente nga mikutlo og kinabuhi.
I via Renante Socia Lada