Nakabsan sa kinabuhi ang usa ka drayber sa motor nga walay helmet human nadasmag sa poste ang gimaniho niini nga motorsiklo.
Ang aksidenti nahitabo didto sa Gate entrance/exit Camella Homes, Barangay Lawaan Uno, Siyudad sa Talisay, pasado alas 10:00 sa buntag, Nobiyembre 14, 2024.
Ang biktima giila sa Talisay City Police Station na mao si Bryan Campo, 47-anyos ang panuigon, angol usab ang ankas niini nga si Jiure Baclay, hingkod ang pangidaron, pulos sila residenti sa Barangay Maghaway, sa mao ra nga siyudad. Sa imbestigasyon nasayran nga ang duha luwan sa usa ka motorsiklo nga kusog ang dagan palugson nga nawad-an sa kontrol na maoy hinungdan nga nabangga kini.
Ang duha na pulos walay helmet nakahiagom og grabing kadaot sa lawas na maoy hinungdan nga nakabsan gyud sa kinabuhi si Campo.
Ang City of Talisay Traffic Operations and Development Authority (CT-TODA) Subling nag-awhag sa mga nagmaniho sa motorsiklo sa pagsul-ob kanunay sa prescribe helmet kung nagmaniho sa motor. (Renante Socia Lada)