Gisuportahan ni Gobernor Pamela Baricuatro ang pagpanghatag ug importansya sa kahimsog pinaagi sa pagpatuman sa Department of Health–Health Promotion Bureau (DOH-HPB) Healthy Learning Institutions Program nga ipatuman sa 45 ka public schools sa probinsya.
Ang programa gihisgutan atol sa meeting karong Miyerkules, Agosto 27, uban sa DOH-HPB Director III Dr. Dominic Maddumba, DOH-7 representative Dr. Rannie Gravador, ug si Gov. Baricuatro.
Ang programa naglangkob sa pagbansay sa mga magtutudlo aron mas mapauswag ang kahimsog sa sulod sa mga tunghaan ug mahatagan ug luwas nga palibot ang mga estudyante. Adunay gitagana nga pondo nga ₱4.5 milyon para sa 2022 alang sa 15 ka eskwelahan apan wala madayon tungod sa kakulang sa pag-aprubar sa miaging administrasyon. Karon, nadugangan og 30 ka tunghaan nga mahimong benepisyaryo sa programa.
Nagpadayag si Gob. Baricuatro nga andam ang Kapitolyo sa paghatag og counterpart funding aron mas mapalapdan pa ang maong inisyatiba ug mas daghang eskwelahan ang makabenepisyo.
Ang DOH-HPB mao ang nasyonal nga ahensya nga responsable sa paghimo ug pagpangulo sa health promotion programs sa tibuok nasud, kauban ang mga lokal nga gobyerno aron makahimo og mas himsog ug lig-on nga komunidad.
Source: Cebu Province PIO
I via Renante Socia Lada