Gisusi sa Department of Health (DOH) Central Visayas – Center for Health Development (CHD) ang ka-andam sa mga ospital niadtong Disyembre 23, 2025, aron masiguro nga padayon ang serbisyo sa emerhensya ug kritikal nga pag-atiman sa panahon sa Pasko ug Bag-ong Tuig. Ang tanang health facilities gibutang sa Code White Alert atol sa Yuletide season.
Sa pagpanguna ni Regional Director Joshua G. Brillantes, mibisita ang inspection team sa Cebu South Medical Center ug Vicente Sotto Memorial Medical Center.
Tumong niini ang pagtan-aw kon andam ba ang mga ospital sa posibleng pagdagsa sa mga pasyente panahon sa selebrasyon.
Gisusi sa DOH ang igo nga kadaghanon sa health workers, kahimtangan sa emergency room, sakto nga tambal ug medical equipment, ug ang maayong referral system.
Gilantaw usab ang mga pamaagi sa ospital sa pag-atubang sa aksidente sa dalan ug mga samad nga may kalabutan sa pabuto.
Gipasiugda ni Director Brillantes nga dako kaayo ang importansya sa ka-andam sa mga ospital ug sa responsableng pamatasan sa katawhan aron malikayan ang mga emerhensya nga panglawas.
Gidasig niya ang publiko nga magpugong sa pagkaon ug pag-inom og ilimnon nga makahubog ug mosunod sa mga pamaagi sa kaluwasan atol sa holidays.
Source: DOH-7
I via Renante Socia Lada