Gibuksan na karong adlawa, Oktubre 25, 2025, ang Unified 911 Emergency Hotline sa Central Visayas sa usa ka seremonya nga gipahigayon sa PLDT Jones, Cebu City, pinangulohan sa Department of the Interior and Local Government (DILG) ubos sa liderato ni Secretary Juanito Victor “Jonvic” Remulla.
Ang kalihokan gibuksan pinaagi sa usa ka ribbon-cutting ceremony sa Command Center diin ang mga personahe sa Bureau of Fire Protection (BFP) nagpakita sa ilang ka-andam nga motubag dayon sa mga tawag nga moagi sa 911.
Si PLTGEN Jose Melencio C. Nartatez Jr., Acting Chief sa Philippine National Police (PNP), mipasalig sa bug-os nga suporta sa kapulisan alang sa Unified 911 system. Giingon niya nga pinaagi sa panaghiusa sa mga ahensya ug mga LGU, mas mahimong dali, kasaligan, ug epektibo ang pagtubag sa mga emerhensiya.
Samtang si Governor Pamela S. Baricuatro sa Sugbo mipasabot sa iyang pagpasalamat sa PRO7 ilawom ni PBGEN Redrico A. Maranan ug sa Cebu Provincial Police nga nagpakita og 41% nga pagkunhod sa krimen. Iyang gipasalamatan si Presidente Ferdinand R. Marcos Jr. ug si SILG Remulla sa pagdala sa maong programa ug mipasalig nga ang probinsya sa Sugbo motabang aron magmalampuson kini.
Sa iyang mensahe, Secretary Remulla mitumbok nga ang Unified 911 usa ka serbisyo nga motahod sa “pinulongan, kultura, ug tradisyon sa matag Pilipino.” Iyang gipahibalo nga 200 ka bag-ong police vehicles ang ipang-apod-apod sa Central Visayas sa Enero 2026 aron mapalig-on ang mobility sa kapulisan.
Gipadayag usab niya ang plano nga gamitan og advanced technology pinaagi sa “Skynet Initiative” nga mag-deploy og mga long-range drones aron makatabang sa pagpangita ug pagmonitor sa mga sitwasyon sa emerhensiya.
Gipahimangnoan usab ni Remulla ang publiko nga ang mga mag-prank call sa 911 dakpon ug silotan. Iyang ipasabot nga kini usa ka paglapas sa balaod tungod kay makalangan kini sa tinuod nga mga tawag ug makapahamtang sa risgo sa kinabuhi sa uban.
Miapil usab sa kalihokan sila Governor Baricuatro, Mayor Nestor Archival sa Cebu City, Mayor Thadeo “Jonkie” Ouano sa Mandaue, ug Mayor Cindi King Chan sa Lapu-Lapu City, uban ang mga opisyal sa DILG, PNP, BFP, ug uban pang ahensya sa gobyerno.
Ang paglusad sa Unified 911 usa ka dako nga lakang padulong sa mas paspas, mas intelihente, ug mas tinabangay nga emergency response system alang sa kaluwasan ug kahapsay sa publiko.
Source: PRO7- PIO
I via Renante Socia Lada
#rpndykccebu