Wala nakalikay sa kamot sa balaod ang usa ka taxi driver ug duha pa ka indibidwal human sila masikop sa buy-bust operation nga gihimo sa mga operatiba sa PDEA-7 ug Cebu City Police Station 6 sulod sa usa ka giingong drug den sa Sitio Omega, Block 2, Sawang Calero, alas 3:52 sa hapon, Oktubre 24, 2025.
Ang target sa operasyon mao si alias Bruce, 29 anyos, giingong tagdumala sa drug den, samtang nadakpan usab ang duha ka bisita — si alias Virgilio, 44 anyos, taxi driver nga taga Barangay Kamputhaw, ug si alias Solidad, 39 anyos, RTW seller nga lumulupyo sa Sawang Calero.
Nakumpiskar sa mga awtoridad ang tulo ka pakete sa shabu nga may gibug-aton nga 10.06 gramos ug kantidad nga ₱68,408, lakip na ang buy-bust money, cellphone, ug mga drug paraphernalia. Sumala sa PDEA-7 Regional Director Joel Plaza, ang operasyon resulta sa usa ka semana nga surveillance human makadawat sila og reklamo gikan sa usa ka kabarangay nga nabalaka sa kalihokan sa maong dapit.
Ang mga nasakmit nga ebidensya gipasaka na sa PDEA-7 laboratory alang sa eksaminasyon, samtang ang mga suspetsado kasamtangang gidetener sa opisina sa PDEA-7 sa Lahug.
Ubos sa Comprehensive Dangerous Drugs Act, ang pagdumala o pagpahimutang og drug den silotan og tubuok kinabuhi nga pagkabilanggo ug multa nga hangtod ₱10 milyon, samtang ang mga bisita niini posibleng masilutan og 20 ka tuig nga pagkabilanggo ug multa nga hangtod ₱500,000. Padayon karon ang imbestigasyon sa PDEA aron mahibal-an ang mas lawom nga koneksyon sa operasyon sa drogas sa maong lugar.
I via Renante Socia Lada Renante