Gipasira sa Department of Migrant Workers (DMW) ang usa ka establisemento sa dakbayan sa Lapu-Lapu tungod sa kalambigitan niini sa illegal recruitment.
Sa usa ka pakighinabi sa media, gikompirmar ni OIC-Regional Director Maria Eloida Cantona sa DMW Regional Office VII ang maong aksyon. Matud ni Cantona, ang ilang buhatan mipahigayon og imbestigasyon human madawat ang report kabahin sa kalihokan sa maong establisemento.
Nagpahimangno si Cantona sa publiko batok sa mga job offers nga gi-post lamang sa social media. Gi-awhag usab niya ang katawhan nga motaho dayon sa DMW kung makamatikod og katingalahan nga mga kalihokan o sa mga tawo nga nagtanyag og trabaho nga walay klarong papeles.
“Bisan ang simpleng saad nga makapangitag trabaho para sa usa ka tawo, kung walay lisensiya gikan sa DMW, usa na kini ka porma sa illegal recruitment,” pasabot ni Cantona.
Padayon ang kampanya sa DMW aron maprotektahan ang mga Pilipino nga nangandoy nga makatrabaho ilabi na sa gawas sa nasud.
I via Renante Socia Lada