Usa ka lalaki nga nagmaneho og motorsiklo ang namatay human sa aksidente sa South Road Properties (SRP), habig sa Barangay Mambaling duol sa SM Seaside, pasado alas 5:45 sa hapon, Huwebes, Mayo 22, 2025.
Giila ang biktima nga si Feliciano Yalaya Lascuña, 47 anyos, lumulupyo sa Sitio Laray, Barangay San Roque, Talisay City. Si Lascuña gideklar nga dead on arrival sa Cebu City Medical Center tungod sa grabeng kadaot nga iyang naangkon.
Base sa inisyal nga imbestigasyon sa Traffic Enforcement Unit (TEU) sa Cebu City Police Office, nagpadulong sa southern part sa siyudad ang dump truck ug motorsiklo sa dihang nahitabo ang insidente. Ang truck nagsubay sa center lane, samtang ang motor naa sa outer lane.
Matod sa drayber sa trak nga si Margarito Avenido Abais, 38 anyos, taga Barangay Inayawan, kalit nga naguba ang iyang tuong ligid hinungdan nga siya mihunong. Dili pa klaro kung unsa gyud ang hinungdan sa insidente apan giingon sa drayber nga iyang nadunggan ang kalit nga kasaba ug pagkahuman nakit-an na lang ang biktima nga nagbuy-od sa dalan.
Miatiman dayon ang mga sakop sa Cebu City Transportation Office ug mitawag og ambulansya, apan wala na maluwas ang kinabuhi ni Lascuña.
Gikustodiya na karon sa kapulisan si Abais samtang giandam ang kasong reckless imprudence resulting in homicide. Giklaro sa drayber nga wala niya gituyo ang insidente.
Nagpadayon pa ang imbestigasyon sa kapulisan aron matino ang tibuok detalye sa aksidente.
📸 CTTO