Usa ka dako nga kadaugan batok iligal nga drogas ang nakab-ot sa Police Regional Office 7 (PRO7) human sa 24-oras nga operasyon gikan Setyembre 19 hangtod 20, 2025, diin kapin ₱1 milyon nga balor sa shabu ang nasakmit ug 31 ka suspetsado ang nadakpan sa 22 ka operasyon sa tibuok Central Visayas.
Ang labing dako nga kaso nakit-an sa Sitio Central, Barangay Bulacao, Talisay City, diin ang Talisay City Police Station sa ilawom sa Cebu Police Provincial Office (CPPO) nakasakmit og 110 gramos nga shabu nga nagkantidad ₱748,000 – ang pinakadako nga nasakmit sa tanang operasyon.
Lakip sa nadakpan mao ang usa ka high-value individual ug 31 ka bag-ong nailhan nga drug personalities, nga giingong aktibo sa pagpanghatag ug iligal nga drogas sa rehiyon.
Gipadayag ni PBGEN Redrico A. Maranan, Regional Director sa PRO7, ang iyang pasalamat sa tanang yunit nga misalmot sa operasyon.
Kini nga kalampusan kabahin sa padayon nga kampanya sa PRO7 kontra drogas, iligal nga armas ug terorismo, subay sa direktiba sa Acting Chief PNP, aron masiguro ang mas luwas ug malinawon nga komunidad para sa tanan.
Source: PRO7- PIO