Tulo ka suspetsado ang nadakpan ug duha ka menor-de-edad ang naluwas sa duha ka lahi nga insidente sa Toledo City kaniadtong Setyembre 27, 2025, atol sa operasyon sa kapulisan nga orihinal unta alang sa pag-monitor sa usa ka wanted person.
Samtang nagbantay ang mga operatiba, duol kanila ang pipila ka mga babaye nga nagtanyag og daotan nga serbisyo bugti sa kuwarta. Sa tinago nga operasyon, dali nga gi-establisar ang transaksyon ug gidakop ang mga suspetsado. Nakaresulta kini sa kaluwasan sa duha ka menor-de-edad nga gi-exploit sa iligal nga kalihukan.
Ang mga biktima dayon gipaubos sa pag-atiman sa Department of Social Welfare and Development (DSWD) ug City Social Welfare and Development Office (CSWDO). Nakumpiskar usab sa operasyon ang marked money ug mga cellphone nga gigamit sa pagmaniobra sa transaksyon.
Gidala ang mga suspetsado sa presinto alang sa dokumentasyon ug medical examination, samtang gisaka ang kasong may kalabotan sa human trafficking niadtong Setyembre 29, 2025.
Sa iyang pamahayag, si PBGEN Redrico A. Maranan, Regional Director sa Police Regional Office 7, miingon: “This successful operation is a testament to the vigilance of our personnel, who, while focused on locating a wanted person, were able to uncover and act swiftly against human trafficking activities. PRO7 will never allow our communities to become havens for exploitation. We stand committed to protect our youth from abuse and bring perpetrators to justice.”
Nagpasidaan usab ang PRO7 batok sa mga indibidwal nga magpadayon sa pag-exploit sa mga kabataan ug ubang biktima nga adunay kahuyang.
Gipasalig sa kapulisan nga magpadayon ang walay hunong nga operasyon aron matapos ang ingon nga klase sa abuso ug masiguro ang kaluwasan sa matag bata sa rehiyon.
Source: PRO7- PIO
I via Renante Socia Lada