Nasulbad dayon sa Cebu Provincial Police Office kon CPPO ang usa ka kaso sa pagpamusil nga nahitabo sa sayong buntag sa Disyembre 29, 2025 sa Sitio Sambagan, Barangay Tabunok, Talisay City, sulod lang sa menos walo (8) ka oras.
Mga alas 3:00 sa kadlawon, gipusil ang usa ka lalaki nga residente sa maong lugar ug gidala dayon sa Cebu South Medical Center, apan Dead on Arrival na pag-abot sa ospital.
Dali nga miaksyon ang Talisay City Police Station ug nagsugod og imbestigasyon samtang presko pa ang mga impormasyon.
Pinaagi sa paspas nga imbestigasyon ug pagpangutana sa mga saksi, nailhan ang suspek nga usa ka 47 anyos nga laborer nga nagpuyo sa Sitio Mananga, Barangay Tabunok. Nadakpan siya mga alas 9:30 sa buntag sa usa ka dapit duol sa lugar sa insidente. Ang live-in partner sa biktima mitudlo ug miila sa suspek isip mipusil.
Nasakmit usab sa kapulisan ang ebidensya lakip ang usa ka bala sa caliber .38, nga ipadala sa forensic examination alang sa lig-on nga basihan sa kaso.
Gidayeg ni CPPO Director PCOL Abubakar Udang Mangelen Jr. ang kapulisan sa ilang paspas ug propesyonal nga aksyon, ug miingon nga kini nagpakita sa ilang dedikasyon sa paghatag og hustisya ug sa pagpanalipod sa katawhan.
Ang suspek karon anaa na sa kustodiya sa kapulisan samtang giandam ang kaso sa murder nga ipasaka sa City Prosecutor’s Office. Mipasalig ang kapulisan nga magpadayon silang magbantay aron mapadayon ang kalinaw ug kahapsay, ilabi na karong holiday season.
Source: CPPO
I via Renante Socia Lada