Gibutyag sa Cebu Police Provincial Office (CPPO) nga daghan na kini’g nakab-ot nga kalampusan sa ilang hugot nga kampanya batok sa krimen gikan Hulyo 1 hangtod Agosto 27, 2025. Kini nagpakita sa walay undang nga paningkamot sa kapulisan aron mapanalipdan ang katawhan ug mapukan ang iligal nga kalihukan sa lalawigan.
Sa kampanya kontra iligal nga drogas, nakahimo ang CPPO og 391 ka operasyon nga mitultol sa pagkasikop sa 564 ka suspetsado. Nakumpiskar usab ang 4,790.39 gramos nga shabu nga nagkantidad og ₱32.5 milyon ug 161 ka marijuana stalks nga nagkantidad og ₱32,200, nga dakong pagkapukan sa supply sa iligal nga drogas sa Cebu.
Sa pagpangdakop sa mga wanted, nakatuman ang kapulisan og 265 ka operasyon ug nakaserbi og 294 ka warrant of arrest. Ani-a ang resulta: 262 ka tawo nadakpan, lakip na ang 49 ka most wanted persons ug 213 ka laing wanted individuals, nga nakapamenos sa presensya sa mga pinangita sa komunidad.
Sa kampanya batok iligal nga armas, nakahimo og 157 ka operasyon nga mitultol sa pagkasikop sa 80 ka tawo ug pagka-rekober sa 87 ka pusil. May 75 ka pusil nga boluntaryo nga gisurender, ug 84 ka kaso nga gipasaka sa korte. Apil usab ang Oplan Katok aron masiguro nga accountable ang mga tag-iya sa armas nga wala marehistro.
Sa operasyon batok iligal nga sugal, nakahimo og 179 ka operasyon nga miresulta sa pagkasikop sa 240 ka violators ug pagkakumpiska sa ₱60,485 nga pusta.
Nagpahimangno si Gobernor Pamela S. Baricuatro sa mga kriminal nga ang Sugbo dili luwas para nila kay ang bakaod ipatuman gyud.
Si CPPO Provincial Director PCOL Christopher M. Bermudez midayeg sa kaisog ug disiplina sa iyang mga pulis. Giingon niya nga kini nga mga kalampusan dili lang numero, kundili ebidensya nga ang kapulisan sa Cebu nagsunod sa pamatasan, pagrespeto, ug propesyonalismo nga gipaabot sa katawhan.
Pinaagi sa padayon nga pagbantay sa kapulisan, kooperasyon sa komunidad, ug lig-on nga liderato sa lokal nga gobyerno, gilauman nga magpadayon ang Cebu Province sa pagbatok sa tanang matang sa krimen.
Source: CPPO
I via Renante Socia Lada