Padayon ang kampanya sa kapulisan sa Cebu Police Provincial Office (CPPO) ilawom sa “Safer Cities Initiative” diin miabot sa 486 ka mga tawo ang nadakpan tungod sa lain-laing paglapas sa lokal nga ordinansa sa tibuok lalawigan sa Cebu kagahapon Hunyo 16, 2026.
Sa 24 oras nga operasyon gikan alas 12:01 sa tungang gabii hangtod alas 11:59 sa gabii, miabot sa 224 ka police operations ang gihimo sa mga siyudad ug munisipyo.
Pinakadaghan sa mga kaso mao ang paglapas sa traffic ordinances nga mikabat sa 319 ka kaso, sunod ang pag-inom sa publiko, curfew violations sa mga menor de edad, paglakaw nga walay t-shirt, ug pagpanigarilyo sa public places.
Sa kinatibuk-an, 319 ka violators ang gipahamtangan og multa, samtang 167 ang gipasidan-an ug gipagawas lang. Ang kampanya nakakolekta usab og ₱237,950.00 gikan sa mga multa ug penalties. Ang mga lungsod nga adunay pinakadaghan nga nadakpan mao ang Sogod, Oslob, ug Samboan.
Sumala sa Police Regional Office 7, ang kampanya dili lang para sa pagdakop kondili para sa pagpahimutang og disiplina ug paglikay sa krimen. Gipasabot sa mga opisyal nga magpadayon ang operasyon aron mapadayon ang kalinaw, kahapsay, ug kaluwasan sa mga komunidad sa Cebu.
I via Renante Socia Lada