Gihatagan og Arrival Honors sa Police Regional Office 7 (PRO7) si Major General Michael G. Samson, Commander sa 3rd Infantry Division sa Philippine Army, atol sa iyang pagbisita sa Camp Sergio Osmeña Sr. sa Cebu City kagahapon Marso 26, 2026.
Ang seremonya nga gihimo sa hedkuwarter sa PRO7 gitambongan sa mga opisyal ug kapulisan aron pormal nga abi-abihon ang Army commander ug ipakita ang lig-on nga panagtinabangay tali sa Philippine National Police (PNP) ug Philippine Army.
Sa iyang mensahe, gipasiugda ni PRO7 Regional Director PBGen Redrico A. Maranan ang kamahinungdanon sa padayon nga kooperasyon sa duha ka ahensya, ilabi na sa ilang hiniusang mga operasyon alang sa kalinaw ug seguridad.
Matod pa niya, dako na ang ilang nahimo nga kalamboan sa ilang panag-uban, lakip na ang malampusong pagdumala sa bag-ong ASEAN Summit diin nakita ang lig-on nga koordinasyon ug dedikasyon sa serbisyo, nga nakatabang sa mas epektibong pag-atubang sa mga hagit sa public safety ug national security.
Atol sa maong pagbisita, gidayeg usab ni MGen Samson ang liderato ni PBGen Maranan tungod sa iyang natampo sa internal security operations, disaster response, ug sa malinawon ug hapsay nga National ug Local Elections 2025, ingon man sa uban pang dagkong kalihokan sa Central Visayas. Tungod niini, gihatagan siya og Military Merit Medal.
Gihatagan usab og maong medalya sila PCOL Isagani A. Fetizanan, PCOL Arnel J. Apud, PCOL Enrico E. Figueroa, ug PCOL Leoncio Baliguat Jr. isip pag-ila sa ilang dedikasyon ug kahanas sa katungdanan.
Ang pagbisita ni Major General Samson nagpalig-on pa sa relasyon tali sa PNP ug Armed Forces of the Philippines, uban sa ilang padayon nga paningkamot aron mapadayon ang kalinaw, kahapsay, ug kaluwasan sa mga komunidad sa Central Visayas.
Source: PRO7 PIO
I via Renante Socia Lada