Nagpadayon ang Cebu City sa pagpalambo sa turismo alang sa Muslim nga mga bisita pinaagi sa pagpalig-on sa Muslim-Friendly Tourism initiatives sa siyudad.
Niadtong Marso 4, gidawat ni Nestor Archival, mayor sa Cebu City, si Myra Paz Abubakar, Undersecretary sa Department of Tourism, ug si Gelena Asis-Dimpas, OIC Regional Director sa DOT Region 7, sa usa ka courtesy visit sa City Hall.
Sa ilang panaghisgot, gihisgutan ang mga plano aron madugangan ang mga hotel ug accommodation nga mosunod sa Muslim-friendly standards ug aron madaghan ang mga restoran nga adunay halal certification sa siyudad.
Ang maong programa nagtumong sa paghatag og serbisyo ug pasilidad nga motahod sa kultura ug relihiyosong praktis sa mga Muslim nga turista, aron mahimong mas bukas ug maabiabihon nga destinasyon ang Cebu City.
Gipaambit usab ni Mayor Archival ang iyang plano nga magtukod og Muslim Section sa Cebu City Medical Center, nga gisuportahan sa DOT.
Gihisgutan usab sa miting ang paghimo og espesyal nga tour packages alang sa Muslim nga mga turista aron mas mapalambo ang ilang kasinatian sa pagbisita sa siyudad.
Nagpasalig ang DOT nga motabang sa Cebu City Government sa pagpatuman sa mga programa ug mga basihan aron mapalambo ang Muslim-Friendly Tourism sa siyudad.
Source: Cebu City PIO
I via Renante Socia Lada