Gipahamtang sa Office of the Ombudsman ang preventive suspension sulod sa unom (6) ka buwan batok kang Cebu Governor Gwendolyn Garcia. Ang suspensyon resulta sa reklamo nga gisang-at ni Moises Garcia Deiparine, nga naglakip sa dagkong alegasyon sama sa grave abuse of authority, gross misconduct, serious dishonesty, gross negligence, ug conduct prejudicial to the best interest of the service — mga kalapasan ubos sa Republic Act No. 6713 o ang Code of Conduct and Ethical Standards for Public Officials and Employees.
Sumala sa reklamo, si Gobernador Garcia giingong niisyu og Special Permit No. 2024-09 ngadto sa Shalom Construction, Inc. niadtong Mayo 14, 2024 bisan wala kini Environmental Compliance Certificate (ECC) ni Certificate of Non-Coverage (CNC) gikan sa DENR. Dugang pa, giingon nga wala usab kini nakigsabot o nakigkonsulta sa mga may kalabutan nga ahensya sa gobyerno.
Sa iyang tubag, giangkon ni Garcia nga nadawat niya ang kopya sa suspensyon, apan giangkon usab niya nga wala siyay kahigayonan sa pagtubag sa reklamo. Iyang gipadayag nga ang maong permit gi-isyu isip tubag sa grabe nga krisis sa tubig nga nakaapekto sa daghang lugar sa Metro Cebu. Sumala pa ni Garcia, ang aksyon gihimo uban sa pakig-alayon sa DENR, EMB, ug uban pang ahensya.
Gipasabot usab sa gobernador nga gi-deklarar sa Cebu Provincial Board ang state of calamity sa tibuok lalawigan, nga nagtugot sa pagpatuman og emerhensyang lakang sama sa pag-isyu sa maong permit.
Sa pagkakaron, giandam sa kampo ni Garcia ang legal nga mga lakang aron iapela ang suspensyon. Gisiguro usab niya sa publiko nga magpadayon ang iyang paningkamot sa pagserbisyo ug pagpanalipod sa katawhan sa Sugbo.
Ang maong suspensyon usa ka dagkong isyu sa politika sa lalawigan, ilabi na nga hapit na ang eleksyon karong Mayo 2025, diin si Garcia misalmot pag-usab.
I via Renante Socia Lada