Usa ka 25-anyos nga lalaki ang napalgang patay, gigapus gamit ang packaging tape, ug gibayaan sa poste sa Barangay Punay, Aloguinsan, Cebu sa kaagahon karong Abril 29, 2025.
Ang biktima giila sa iyang pamilya nga si Robert Genotiva, molupyo sa Purok Sunflower, Barangay North Poblacion, San Fernando. Siya gipangita human wala mopauli sa ilang balay, ug nadiskobrehan sa mga nag jogging nga miagi sa maong dapit.
Base sa imbestigasyon sa kapulisan, ang lawas ni Genotiva nakit-an nga gigapos ang kamot ug tiil, samtang gitabonan og t-shirt ang nawong. May nakita usab nga papel nga nagbasa: “Wag tularan, drug pusher ko.” Wala’y nakita nga bala o basiyo sa palibot, nga nagdugang sa huna-huna sa kapulisan nga patay na kining daan ug gidala ra ang lawas sa maing dapit.
Si Elaine Genotiva, inahan sa biktima, mipanghimakak nga kriminal ang iyang anak ug mihangyo sa publiko nga tabangan sila aron makab-ot ang hustisya.
Padayon pa ang imbestigasyon sa mga otoridad aron masuta ang motibo sa krimen ug mahibal-an ang responsable sa brutal nga kamatayon sa biktima.
I via Renante Socia Lada