Sa ika-15 ka adlaw sa iyang paglingkod isip gobernador sa Sugbo, gipirmahan ni Gov. Pamela “Pam” Baricuatro ang pagpagawas sa ₱180,742,256.60 nga pondo alang sa mga ospital sa probinsya.
Ang maong kantidad ilawom sa Maintenance and Other Operating Expenses (MOOE) gamiton sa operasyon sa 4 ka Provincial Hospitals ug 12 ka District Hospitals sa tibuok Sugbo para sa Hulyo ug Agosto 2025.
Gilauman nga ang pondo gamiton sa pagpalit og tambal ug medical supplies aron masiguro nga andam ang mga ospital sa pag-atiman sa mga pasyente. Giila sa kapitolyo ang kakulang sa suplay ug tambal isip dakong hagit sa mga pampublikong ospital, hinungdan nga gihatagan kini og prayoridad sa administrasyon.
Matud ni Gob. Pam, ang panglawas dili lang pribilehiyo kundi katungod sa matag Sugboanon. Ilawom sa iyang pagpangulo, ipatuman ang mga lakang aron mapadali ang access sa kalidad nga serbisyo medikal ilabi na sa mga kabus ug mga lagyo nga lugar.
Sa iyang mensahe, misaad si Gob. Baricuatro nga ipadayon ang transparente ug malungtarong serbisyo publiko, ug masiguro nga ang mga Sugboanon makabenepisyo sa pondo sa panglawas. Gitumbok niya nga ang pagpalig-on sa public health system usa sa mga nag-unang tumong sa Bag-ong Sugbo.
📸 Gob. Pam Baricuatro
I via Renante Socia Lada